ඔබ සතුව හෝ ඔබ ආයතනය සතුව ඇති භාවිතා කළ, එහෙත් තව දුරටත් භාවිතා කළ හැකි අධ්‍යාපනික සම්පත් තිබේනම් අපවෙත ලබා දෙන්න
සාමාන්යයෙන් සිදුවන්නේ, ඔබ හෝ ඔබේ දරුවා භාවිතා කල, පොත්, පාසල් උපකරණ, නිබන්ධන, ප්රශ්නපත්ර ආදීය නිවසේ මුල්ලක දුවිලි ගසමින් නිකරුනේ විනාශ වීමට ඉඩහැරීමයි. නැතහොත් තවකෙකුට ප්රයෝජනයට ගතහැක එම ද්‍රව්‍ය කුණු කුඩයට විසිකර දැමීමයි. තවද කඩ සාප්පුවල, කර්මාන්තශාලා වල කල් ඉකුත්වන පොත් පත්, ඇදුම් පැළදුම් හා පාසල් උපකරණ විනාශකර දමන අවස්ථා කොතෙකුත් ඇත.
මෙම වැඩසටහන මගින් එවැනි අධ්‍යාපන උපකරණ ඵලදායී ලෙස නැවත භාවිතයට යොමු කරමින් දහසකුත් අගහිගකම් මැද අධ්යාපනය ලබන සිසු දරුවන් හට මහගු ප්රයෝජනයක් ගෙන දීම කටයුතු කෙරේ.
පරිත්යාගශීලීන්ට ද මුදල් වියදම් නොකොට, තමන් සතුව ඇති ප්රයෝජනයට නොගන්නා, එහෙත් අවශ්‍යතා ඇති දරුවන්ට මහගු ප්රයෝජනයක් වන එවන් සම්පත් පරිත්‍යාග කිරීමට මෙමගින් අවස්ථාව උදා වී තිබෙනවා.
පොත් පත් පරිත්‍යාගය
පාසල් විෂය නිර්දේශයට අනුව ලියවුනු පොත් පත්, කෙටිකතා, නව කතා පොත්, නිබන්ධන, සටහන් පොත්, ප්‍රශ්න පත්‍ර හා අභ්‍යාස පොත් මෙන්ම සටහන් ලිවිමට භාවිතා කරන පොත් මේ යටතේ ඔබට පරිත්‍යාග කල හැක.
පොත් පරිත්‍යාග කිරීමේදී සැලකිලිමත් විය යුතු කරුණු
- බොහෝ පැරණි විෂය නිර්දේශයන්ට අදාල පොත් පත් සමහර විටෙක තවකෙකුට අවශ්‍ය වේද යන්න සලකා බලන්න.
- පිටු ඉහිරුණු හා විනාශයට යමින් පවතින පොත් පරිත්‍යාග කිරීමේදී, තවකෙකුගේ අවශ්‍යතාවය සහ පොතෙහි වටිනාකම පිලිබදව සලකා බලන්න.
- හැකි සෑම විටම නැවත භාවිතයට ගතහැකි වටිනාකමක් සහිත පොත්පත් පරිත්‍යාග සදහා යොමුවන්න.
- ඔබ ලබාදෙන පොත් පත්වල ඔබේ පෞද්ගලික තොරතුරු හෝ යම් සටහන් තිබේනම් ඒ පිලිබදව සැලකිලිමත්ව පරික්ෂා කර බලා පරිත්‍යාග කරන්න.
- ඔබ ලබාදෙන පරිත්‍යාග පුද්ගලිකව හා කණ්ඩායම් වශයෙන්, සංවිධාන මගින් හෝ පාසල් මට්ටමින් සිදුකල හැකිය.
සටහන් ලියන පොත් පරිත්‍යාග කිරීම
ඔබ සටහන් ලිවීම සදහා භාවිතා කරන පොත් පත් සමහර අවස්ථාවලදී පිටු කිහිපයක් ලියා ඉවත දමන අවස්ථා ඇත. එම පොත් වල එම භාවිතා කල පිටු ඉවත්කර අප වෙත ලබාදීමට හැකිය. දිවයින පුරා විසිරී සිටින අපගේ ස්වෙච්ඡා නිලධාරීන් හරහා මෙන්ම පරිත්‍යාග එකතු කරන මධ්‍යස්ථානවලදී එම ද්‍රව්‍ය ඔබට පරිත්‍යාග කල හැකිය.
ආර්ථික අපහසුතා සහිත බොහෝ දරුවන්ගේ දෙමාපියන් තම දෛනික අවශ්‍යතා ලබා ගන්නේද ඉතා අපහසුවෙනි. සමහර දරුවන් දෙමාපියන්ගේ හව්හරණක් නොමැති ජීවත්වෙන අවස්ථාද වේ. තවත් දෙමාපියන්ට ස්ථීර ආදායම් මාර්ගයක් නොමැතිව අසරණව සිටිති. ඔබ හෝ ඔබේ දරුවන් භාවිතා කළ, තව දුරටත් භාවිතා කළ හැකි ඉතා හොද තත්ත්වයේ ඇදුම්, නිළ ඇදුම්, පාවහන් එවැනි දරුවන්ට මහගු අස්වැසිල්ලක් වනු ඇත. එය ඔවුන්ගේ පාසල් අධ්‍යාපන කටයුතුවල යෙදීමට විශාල ශක්තියක්ද වනු ඇත.
ඇදුම් පැලදුම් හා පාවහන් පරිත්‍යාග කිරීමේදී පහත සරල හා වැදගත් කරුණු පිලිබදව සැලකිලිමත් වන්න
- සෑම විටම තවදුරටත් භාවිතා කලහැකි ඇදුම් පැලදුම් හා පාවහන්, පාසල් බෑග් පමණක් අපවෙත ලබා දෙන්න.
- භාවිතා කළ ඇදුම් පැලදුම් සෝදා, පිරිසිදුකොට අයන්කර ලබා දීමට කාරුණික වන්න.
- පරිත්‍යාග පාර්සල්කර ලබා දීමේදී ඒවා විනිවිදව දැකිය හැකි ලෙස ආවරණය කර, පිටත ඒවායේ ප්‍රමාණයන්, කාන්තා හා පිරිමි යන්න සහ වර්ගය සදහන් කොට දක්වන්න.
- භාවිතා කල යට ඇදුම් ආදිය පරිත්‍යාග කිරීමෙන් වලකින්න.
- පොත් බෑග් පරිත්‍යාග කිරීමේදී ඒවායේ තත්ත්වය පිලිබදව සැලකිලිමත් වන්න
සෙල්ලම් බඩු සහ උපකරණ පරිත්‍යාගය
සෑම දරුවෙකුගේම සුන්දර මතකයන් සමග සෙල්ලම් බඩු වලට ඇත්තේ අසීමිත සම්බන්ධයකි. කුඩා දරුවන්ගේ සිට මුල් පාසල් අවධිය දක්වා සුවිශාල බැදීක් දරුවන්ට සෙල්ලම් බඩු නිසා ඇතිවේ. එහෙත් එදිනෙදා ආහාර වේල පවා අසීරුවෙන් සපයාගන්නා දුප්පත් දෙමාපියන්ට තම දුවා දරුවන්ට නානාවිධ සෙල්ලම් බඩු ලබා දීම සිහිනයකි. එහෙත් ඔවුන් තම දරුවන්ට මේවා ලබා දීමට මහත් ආසාවෙන් සිටී.
ළමා මනස වර්ධනය කිරීමේ ක්‍රියාකාරකම්වලදී සෙල්ලම්බඩු වලට ලැබෙන්නේ සුවිශේෂී තැනකි. ඔබටත් හැකිනම් ඔබ හෝ ඔබේ දරුවා භාවිතා කල සෙල්ලම් බඩු තවත් දරුවෙකුට පරිත්‍යාග කරන්නට, එය මහගු වටිනාකමක් ඇති කටයුත්තකි.
භාවිත කල සෙල්ලම් බඩු පරිත්‍යාග කිරීමේදී ඔබ සැලකිලිමත් විය යුතු කරුණු.
- කඩා විසිරුණු හා කොටස් අඩු සෙල්ලම් බඩු පරිත්‍යාගයෙන් වලකින්න.
- ළමයින්ට අනතුරුදායක සෙල්ලම් බඩු පරිත්‍යාග කරන්න එපා.
- සෙල්ලම් බඩු ආවරණය කරන පාර්සල්වල වයස් කාණ්ඩය හා වර්ගය දැක්වීම පරිත්‍යාග ක්‍රියාවලිය පහසු කරවයි.
